ادبی دنيا

روښان يوسفزے زمونږ پۀ ملګريو کښې دَ روښان فکرۍ علامت دے چې دَ خپل ژوند دَ ډېرو تاؤدو سړو نه راتېر شوے دے، دَ معاشی اؤ معاشرتی بد حالۍ ، بې وزلۍ، بې څوکۍ ښکار شوے دے، خو غاصب اؤ صياد دامونه يې پۀ خپل فکری اؤ فطری زور لکه دَ بازخپلو پنجو کښې لۀ ځانه سره اوړی دی. تر څومره چې ماته د هغۀ ژوند، کار اؤ زيار معلوم دے، نو پۀ کلی کښې يو ساده باده زميدار مزدور اؤ پۀ ساده باده جامه، څادر پۀ اوږه، دَ سر وېښتۀ اؤ برېت وسمه کړی خضابی ځوان، لۀ ما يؤ کال مشر، دَ غم ښادۍ سماجی سړے دے، خو يؤ فطری اؤ فکری شاعر هم دے، چې دَ حالاتو اؤ وختونو پۀ بټۍ کښې سرۀ زر، پاسه اؤ کُندن شوے دے

لۀ جلسۍ صوابۍ نه تر کراچۍ، لۀ پېښوره تر تُرکی اؤ تر مکې مدينې رسېدلے دے، نو دا يې هم پۀ قسمت لۀ ازله ليک وو کۀ نه پۀ عقل ګرانه وه زما دَ جانان مينه. هغۀ دَ اولس اؤ اولسی ژوند ډېره لۀ نزدې مشاهده کړې ده، ډېره خوره وره مطالعه يې دَ ذهن مُحافظ خانه کښې مْجتَمِع کړې ده اؤ بيا يې دغه مشاهدې اؤ مطالعې لۀ دَ ترخې تجربې نه توری، ټکی اؤ ژوندی لفظونه راټول کړی اؤ دَ هر خاص اؤ عام مخې ته دَ ساده باده وينا اؤ سوچه، ساهو اؤ اصيلو مرغلرو پۀ شکل کښې ايښی دی. دَ ژوند دَ احساساتو حدت، دَ جذباتو شدت، دَ منفرد ليک شان جدت، دَ ټکيو نُدرت، دَ ترکيبونو نوښت، قادرالکلامه قدرت اؤ دَ رومانويت اؤ مقصديت نۀ ډکه ترقی پسنده شاعرۍ کښې يې دَ علامت نګاری نخښې نښانې هم شته، مقاميت اؤ قوميت هم لری، دَ خپلو اکابرينو دَ خيال پۀ سيوری تګ هم ترې څرګندېږی، دَ داخليټ اؤ خارجيت پۀ اساس دَ وختونو دَ جولۍ نه يې خپله برخه لۀ ازله خپل سرشت کښې راوړې ده اؤ داسې يې دَ خپلو ادبی اسلافو کاکاجی، اجمل خټک، قلندر مومند، سېف الرحمان سليم اؤ سلیم راز مرحومينو پۀ رنګ دَ وختونو دَ خدايانو دَ خود سره خدايۍ بُتان رېزګی رېزګی کړی دی

روښان يوسفزی کښې ډېر صلاحيتونه موجود دی، ځکه هغه اوس پۀ يؤ وخت شاعر هم دے، اديب هم، صحافی هم، پښتون دانشور هم اؤ دَ علامه قلندر مومند «دَ ساهو ليکونکيو مرکه پېښور» پۀ چينه سېراب شوے اؤ «دَ ادبی دوستانو مرکه مردان» دَ رڼو اوبو ونه باندې يې خُله اېښې ده اؤ خپله تخليقی، تحقيقی اؤ تنقيدی تنده يې ماته کړې يؤ کل وقتی ساهو ليکونکے اؤ سپېځلے صحافي دے چې خپل ويښ احساس، بيدار شعور اؤ ضمير ته هېڅ ملامت نۀ دے اؤ پۀ نننۍ ادبی، صحافتی اؤ سياسی منظر نامه کښې سر هسک اؤ سُرخ روُ ولاړ دے اؤ نن چې هغه « دَ رڼا خوب » نه تر « دَ رڼا کور» ته رارسېدلے دے، نو پکښې يې خپل نۀ ستړے کېدونکے محنت، مشقت اؤ بې شانه همت، پت، پښتو اؤ غېرت شامل دے

دَ روښان پۀ روښانه شاعرۍ کښې غزلونه، نظمونه ازاد نظمونه، قطعات اؤ متفرقات شامل دی چې دَ هغۀ دَ روښانه شاعرانه فکرونو حامل اؤ دَ رنګين، رومانوی ژوند حاصل دی اؤ دَ سوشل ميډيا دې ان سوشل دور پۀ دې بې هنګمه شور  اؤ ګڼه ګوڼه کښې يې اواز ډېر منفرد اؤ ډېر اوچت راخېژی