ماته غوږ شه

ليک. نورالبشر نويد

ما درته وې تا نه منله

افغانانو روڼو…!!
ما تاسو ته د ثور انقلاب څخه راواخله د جهاد ،فساد د هر هر رنګ او شکل پورې د پېښور نه بلها چغې وهلې

ماته غوږ شه
ماته غوږ شه

تاسو به وئيل زمونږ په وطن جهاد راغلی دے. مونږ د سرو کافرو سره انښتی يو نيغ به جنت ته ځو… مونږ ته پاکستان مسلمان رور وئيلی دی چې دا ستاسو د مهاجرت کور دے ديخوا راځئ، مونږ درله په اسلامی، اخلاقی.مزهبی، او د ګاونډيتوب په مسلمانه جزبه پناه درکوو.. ما به درته وئيل. دا مسلمانی مونږ ته معلومه ده د پاکستان په جغرافيه کښې پښتنو له خپل انسانی حقونه نه ورکوی او تا په توګه راپشا کوی ديخوا دې راړوی کمپونه درله جوړوی.حتا چې عبوری حکومت درله جوړوی

پاکستان په خپل کثيرالقوم ملک کښې څلور قومی روڼه نشی منلی او ستا اوه برګ بروګ روڼه راټولوي چې مزهب مو يو دی ژبه کلتور مو يو دے خو د پټکو رنګونه او مسلکونه مو جدا جدا دی دلته ې درله د بنسټپالو نه يو يو برګ بروګ روڼه هم درکړی دی او  ټولو ته پاکستان خپل پلار وای.

ستاسو جهاد فساد جنګ مړی او ژوندی هر څه ې په عالمی منډهئ کښې خرڅ کړل ستاسو د وطن هره شربت ګله ې د عالمی کيمرو په سترګه نمايش کړه ټول عرب ، غرب،او ټول يورپ د يخو نه ګرمو اوبو ته راغلل ، پاکستان خپل کشميری جهاد په افغان جهاد کښې تحليل کړو بنياد پرستو فلسطين او بيت المقدس مزهبی غږونه د خپلو منبرونو او محرابونو نه په کابل لکه د توغندو ورول. د پښتونخوا او کابل په هواګانو کښې تراخه بارود ګډ شول. حتا چې خاموش مجاهدينو درته د اسلام آباد نه دا شعار درکړو.

Kabul must burn
دغه شعار تاسو ته مزهبی استازانو داسې ترجمه کړو.
بايد چې کابل وسوزی.
ما به درته ويل

..!!

ماته غوږ شه!!

دا دروغ وای. فوځی وردی د جنګ علامت دے د امن نا…

خاوره ستا ده. جنګ پکښې پردی کوی. اجرتی قاتل پکښې پاکستان دے. سر ستا دے سنګر د بل….

تا به د سرو کافرو په جهاد کښې  سپينو کافرو ته اهل کتاب ووې او د څوارلس کلن جهاد اخری انجام فساد شو… چې د پېښور نه دې د خپلو مړو قبرونو نه مړی لکه د تجاوزاتو ويستل او په ډيورنډ کرښه بيا اوړېدې تالا والا محبتونه دې څه ديخوا پريښودل څه دې ځان سره اوړل او ما به درته بيا وئيل!! ماته غوږ شه.
نو تا به وئيل.ماته پيغورونه مه کوه….

ستا د فساد نه چې طالب پېدا شو نو بيا مې درته ووې..

جنګ کښې هيڅوک ګټور نه وی.  جنګ په هر حالت کښې تاوان دے.

دا دې اوس ستا د لاس د کرښو يو فالګر نشته چې د شين طوطی په سره مخوکه کښې په سپينه لفافه کښې بند فال تاته ووايي چې !!

وخت به راځی چې غاښ د زهرو به ښامار نه لری
منصور   به  ګرځی  مستانه  ملا  به دار نه لری

ملا اوس هم دار لری دا د ملا د مزهبی جبر پرتشدده تاريخ دے اوس د نوی پرتشدده دنيا په سزا کښې ملا سره په کتاب کښې بارودو دی. د خپل زوړ جنرل ضيا په اروا د خپلې خاورې د وينو باران ته رحمت وای.
دا اوس چې کوم افغان کډوال واپس په زور جبر واپس ليږلی شی نو هيڅوک دا نشی وئيلی چې…!!

اے د بشری حقونو علمبردارانو، ستاسو سترګې مونږ نه وينئ چې دا په کومو شرطونو مو واپس کوی؟؟
اے پاکستانی انصارو!! ستاسو هغه مسلمانی ،مزهبی،اخلاقی، ګاونډګيرئ جزبه څه شوه.؟؟
اے د عربو شيخانو ، منم چې د عربو اسلام اوس سيکولر دے خو د انسانيت رشته خو د ټولې دنيا يوه ده کنه