د امن د ټینګښت لپاره له قبایلي ضلعو څخه د دويم ځل کډوالۍ لړۍ روانه ده

د خیبر ضلعې د تجارتی مرکز باړې څخه شاوخوا دوه نیم کیلومتره لرې، د ډوګره په سیمه کښې د تیراه  کډه شویو کورنیو ته د ټرانسپورټ لګښت د ترلاسه کولو لپاره، د صوبايي حکومت د احکاماتو له مخې نوی مرکز جوړ شوی دی. دلته د سهار له وخته د خلکو اوږده قطارونه لیدل کېږي، خو کارکوونکي لس بجې کار شروع کوی د مرکز د عملې له لوري د لاوډسپیکر له لارې خلکو ته ویل کېږي چې یوازې هغه کسان دننه تللی شي چې تصدیق شوی فارم ولري، او هغه کسان چې نیمګړی فارم لري باید خپلو سیمو کښې موجودو مرکزونو ته ولاړ شي او ضروری کاروای مکمل کړي.

د بې کوره شوو کسانو د اندراج او مالي مرستو په برخه کښې د پرله‌پسې شکایتونو له امله، صوبايي حکومت په باړه میداني سیمه کښې نور مرکزونه هم پرانیستي دي، خو بیا هم ستونزې پر ځای پاتې دي او وخت ناوخت اغېزمن کسان د احتجاج په توګه سړکونه د ټريفک  بندوي.

پنځوس کلن سید محمد خپل کورنۍ، سامان او مالونه په موټر کښې بار کړي او د باړې تیراه پر سړک د کرایې د پیسو ترلاسه کولو مرکز مخې ته ولاړ دی. هغه وایي، پولیسو ورته ویلي چې د مرکز دننه عمله به بهر راځي، اسناد به ګوري او بیا به کرایې پیسې ورکوي، خو درې ساعته تېر شوي او څوک نه دي راغلي، په داسې حال کښې چې ښځې او ماشومان په موټر کښې سختې ستونزې تېروی،

د تیراه په دره کښې د ممکنه پوځي عملیاتو له امله خلکو ته د جنورۍ تر پنځه ویشتمې پورې د سیمې پرېښودو مهلت ورکړل شوی دی. د بې کوره شوو کورنیو رسمي اندراج د جنورۍ له پنځمې پیل شوی، چې د دې لپاره د باړې بازار لوېدیځ لور ته، د تیراه مرکزي سړک باندې، له باړې شاوخوا اویا کیلومتره لرې د پاینده چینې په سیمه کښې د سرکاري هایر سیکنډري سکول کښې لومړنی مرکز جوړ شوی دی. د کاروايئ لپاره ټوکنونه د تیراه په لرباغ مرکز کې ورکول کېږي. له لومړۍ ورځې راهیسې خلک په کاروائي کښې له ستونزو سره مخ دي.

د ستونزو د کمولو لپاره د جنورۍ له نولسمې راهیسې د باړې بازار ته نزدې هر قبیلې ته په خپلو سیمو کښې جلا مرکزونه جوړ شول، خو متاثره کسان وایي چې د مرکزونو له زیاتېدو سره سره وضعیت لا هم خراب دی.

د تیراه د برقمبرخېل سیمې زرولي خان وایي چې د جمعې په ورځ یې له کورنۍ سره کډه کړې وه، خو د پاینده چینې په مرکز کښې ورته وویل شول چې نن د نادرا دفتر بند دی او تصدیق نشي کېدای. هغه وایي چې له هغه ځایه باړې ته راغی، خو له دوو ورځو راهیسې د کرایې پیسو لپاره مرکز ته راځي، خو چارواکي وایي چې ستا پر ټوکن د نادرا تصدیقي مهر نشته، نو ته د کرایې پیسو مستحق نه یې. د هغه په وینا، بې کوره شوي خلک کله یوې او کله بلې سیمې ته لېږل کېږي.

کډوالي په داسې وخت کې روانه ده چې په دره کې سخته یخني پیل شوې او خلک له جدي ستونزو سره مخ دي. د روانو ستونزو له امله د صوبې واکمن ګوند له سختو نیوکو سره مخ دی. د پیپلز پارټۍ ځايي مشر شیر شاه آفریدی د ډوګره په سیمه کښې د احتجاج کوونکو له لوري تړل شوې سړک ته ولاړ و. هغه وویل چې حکومت له کډه شوو کورنیو سره کړي وعدې نه دي پوره کړي، چې له امله یې د خلکو ستونزې ډېرې شوې دي. د هغه په وینا، اصلي اغېزمنو پر ځای نورو خلکو ته اسانتیاوې ورکول کېږي، او حکومت باید عملي ګامونه واخلي.

د ستونزو د حل لپاره د خیبر پښتونخوا وزیر اعلا دوه ځله مرکزونه کتلي او د هر ډول اسانتیاوو سپارښتنه یې کړې، خو بیا هم خلک له بېلابېلو ستونزو سره مخ دي. د سیمې د صوبايي اسمبلۍ غړي عبدالغني آفریدی وویل چې وزیر اعلا خپله راغی، د خلکو ستونزې یې واورېدې او د حل احکامات یې ورکړل، خو تر ټولو لویه ستونزه جعلي ټوکنونه دي. د هغه په وینا، د شفافیت لپاره پرېکړه شوې چې د پولیو واکسین د معلوماتو له مخې شاوخوا نولس زره کورنۍ په تیراه کښې دي، چې لېستونه به په ټولو مرکزونو کښې ځړول کېږي او د نادرا له لارې به تصدیق کېږي.

هغه له نورو سیمو خلکو غوښتنه وکړه چې د اندراج په لړ  کښې دې لومړی د تیراه اصلي بې کوره شوو ته موقع ورکړي.

د سیمې د مشرانو ۲۴ کسیزې کمېټې مشر ملک کمال الدین آفریدی وویل چې د ټرانسپورټ پیسې به یوازې هغو کسانو ته ورکول کېږي چې د تیراه د پولیو واکسین ډیټا ولري او دا به د نادرا له لارې تصدیق کېږي. هغه وویل چې د جعلي ټوکن، بوګس اندراج او هر ډول درغلۍ پر وړاندې به سخته قانوني کاروایي کېږي او ایف‌آی‌آر به درج کېږي. د هغه په وینا، د بې کوره شوو د تصدیق غټ واک کمېټې ته سپارل شوی او په دې کښې به د کوم سیاسي مشر یا جرګې رول نه وي.

د ضلعي چارواکو له مخې، له تیراه څخه تر دې دمه له دېرش زرو زیات کورنیو ته ټوکنونه ورکړل شوي، چې له هغې ډلې د اووه نیم زرو کورنیو کاروای مکمل شوې ده.د تيراه وادئ په اپريشن د فوځ او د صوبې د وزيراعلا موقف د يو بل په ضد دی، خو د دې باوجود علاقه کښې د فوځی اپريشن تيارئ روانې دی